Bakının Böyükşor gölündə suyun bir hissəsinin yaşıl rəngə boyanmasının səbəbi açıqlanıb.
Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən Bakuplus.az-a bildirilib ki, aparılan müşahidə və laborator araşdırmaların nəticələrinə əsasən, göldə müşahidə olunan yaşıl rəngin əsas səbəbi yosun və sianobakteriyaların intensiv inkişafı nəticəsində yaranan bioloji prosesdir.
Qeyd olunub ki, su temperaturu, intensiv günəş şüalanması, eləcə də su mühitində azot və fosfor kimi qida maddələrinin mövcudluğu fotosintetik orqanizmlərin inkişafı üçün əlverişli şərait yaradır. Nəticədə gölün ayrı-ayrı hissələrində yosun və sianobakteriyalar toplanaraq yaşıl rəngli yığıntılar əmələ gətirə bilər.
Məlumata görə, Xidmətin tabeliyində fəaliyyət göstərən Mərkəzi Laboratoriya tərəfindən göldən nümunələr götürülüb və müvafiq analizlər aparılıb. Araşdırmalar müşahidə olunan yaşıl rəngin bioloji mənşəli olduğunu göstərib.
Xidmətdən həmçinin bildirilib ki, sosial şəbəkələrdə hazırda yayılan görüntülər yeni paylaşılsa da, kadrlarda əks olunan hadisə avqustun 14-də qeydə alınıb və artıq araşdırılıb.
"İctimaiyyətdə çaşqınlıq yaranmaması üçün bildiririk ki, məsələ Xidmət tərəfindən nəzarətdə saxlanılır və zəruri hallarda müvafiq tədbirlər görüləcək", - deyə açıqlamada qeyd olunub.
***
Bakının Böyükşor gölündə suyun bir hissəsinin rənginin kəskin dəyişməsi vətəndaşların narahatlığına səbəb olub.
Bakuplus.az xəbər verir ki, bu barədə görüntülər sosial şəbəkələrdə paylaşılıb.
Görüntülərdə gölün müəyyən hissəsində suyun rənginin fərqli olduğu, sahildəki bəzi daşların isə yad rəngə boyandığı əks olunub.
Sakinlərin iddialarına görə, buna səbəb suya hər hansı kimyəvi maddə və ya digər tullantıların qarışması ola bilər.
Məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinə sorğu ünvanlanıb.
Video: @braverauf
