Sosial şəbəkələrdə 6 nömrəli məktəb-liseydə 2-ci sinif şagirdinin zorakılığa məruz qalması ilə bağlı yayılan məlumatlarla bağlı təhsil müəssisəsinin direktoru Gülşən Orucova açıqlama verib. Bu haqda bu gün, 24 yanvar tarixində Bakuplus.az APA-ya istinadən məlumat verir.
Direktorun sözlərinə görə, uşağın valideynləri yanvarın 10-da məsələ ilə bağlı müraciət ediblər. Müraciətə əsasən, dekabrın 4-dən məktəbdə mövcud olan kamera görüntülərinə baxış keçirilib, eyni zamanda Səbail rayon Polis İdarəsinə rəsmi şəkildə müraciət göndərilib. Müraciətdən sonra oradan nümayəndə məktəbə gəlib və şagirdlərlə söhbət aparıldı. Prosesə psixoloq da cəlb olunub və onun iştirakı ilə da şagirdlərlə profilaktik söhbət aparılıb.
Araşdırma zamanı 7-ci sinif şagirdlərinin telefonları götürülüb və orada qeyri-etik videolar aşkar olunub.
"Yəqin ki, həmin şagirdlər videonu öz aralarında bölüşüblər. Mən həmin gündən etibarən valideyn qruplarında aparılan yazışmalardan sonra valideynlərlə də ayrılıqda görüşdüm. Onlara bütün məlumatları verdik", – deyə direktor əlavə edib.
Bununla yanaşı, Elm və Təhsil Nazirliyinə, Məktəbəqədər və Ümumi Təhsil üzrə Təhsil Agentliyinə də məlumat verilib, qurumların nümayəndələri dərhal məktəbə gəliblər.
"Zorakılıq faktı qətiyyən aşkarlanmayıb. Lakin sözügedən VII sinif şagirdlərinin təhlükəsizliyinin təmin olunması üçün valideynlərinə onların məktəblərinin dəyişdirilməsi tövsiyə edilib. Ötən gün şagirdlərin başqa məktəbə yerdəyişmə edildiyi barədə məlumat yayılıb. Lakin yerdəyişmə mərkəzləşmiş sistem üzərindən aparılır. Bu gün biz sistemə baxmışıq, şagird yerdəyişməsi edilməyib. Sadəcə olaraq, mən açıqlama verəndə də onların məktəbdən çıxarılmadığı, sadəcə cümə günü məktəbdə olmadıqlarını qeyd etmişdim. Təəssüf ki, bu barədə məlumat da təhrif olunmuş formada yayımlanıb", – deyə Gülşən Orucova araşdırmanın yekunlarını izah edib.
O, həmçinin əlavə edib ki, müraciətdən sonra məktəbdə mühafizə sistemi gücləndirilib, kameraların sayı artırılıb.
"Övladının istismara məruz qaldığını iddia edən valideyn digər şagirdlərin məktəbdən uzaqlaşdırılmasını tələb edib. Lakin fakt öz təsdiqini tapmırsa, həmin şagirdlərin uzaqlaşdırılması barədə qərar qəbul edə bilmərik. Bu gün pedaqoji iclas da keçiriləcək. VII sinif şagirdlərinin valideynləri ilə bir daha söhbət aparılacaq, – deyən direktor, həmçinin istismara məruz qaldığı deyilən şagirdin məktəbdə təhsilini davam etdirdiyini də vurğulayıb: Lakin valideyni onun məktəbinin dəyişdirilməsini istəyir. Uşağın psixoloji vəziyyəti də qaydasındadır, pozitiv vəziyyətdə olan şagirddir. Məktəblərdə şagirdlərə smart-telefonlar qadağan olunub. 4 ildir biz bunlarla mübarizə aparırıq. Dərslər başlayanda mobil telefonlar yığılır və dərsdən sonra özlərinə paylanılır. Uşağın smartfona ehtiyacı yoxdur. Əlaqə saxlamaları üçün adi telefon da yetərlidir. Biz valideynlərə tövsiyə edirik ki, bu qaydalara riayət etsinlər”.
