Xəzər rayonunun Şağan qəsəbəsində qrunt suları küçələrə axır. Bu haqda bu gün,1 may tarixində Bakuplus.az ARB-yə istinadən xəbər verir.
Söhbət qəsəbənin Heybətqulu Məmmədbəyli küçəsindən gedir. Burada sakinlər ya xüsusi rezin çəkmələrlə, ya da ancaq avtomobillərlə hərəkət edə bilirlər. Yolun kənarına daşlar qoyulub ki, bunların üstü ilə hərəkət etmək olsun.
“Burada bir tədbir görən yoxdur. Avtobus gəlib keçə bilmir. 3 ildir bu vəziyyətdəyik”, - deyə sakinlər şikayət edirlər.
Ərazidə üfunətdən dayanmaq qeyri-mümkündür. Sular küçələrə və zirzəmilərə axır. Yerlilər çarə kimi nasoslarla suyu çəkməyə çalışırlar, ancaq bu da məsələni tam həll etmir.
Yerli bələdiyyədən deyilir ki, nə qədər mübarizə aparılsa da, problemi həll etmək mümkün deyil.
“Azərsu”dan məsələ ilə bağlı isə bildirilib ki, sözügedən ərazidə kanalizasiya suları yoxdur, küçəyə axan yalnız yeraltı sulardır. Gələcəkdə böyük layihə təqdim ediləcək və ümumi kanalizasiya sistemi quraşdırılacaq.
