Vətəndaşlar reseptlə təyin olunan bəzi dərmanları pulsuz ala biləcəklər. Ambulator müalicə üçün lazım olan dərmanlar İcbari Tibbi Sığorta zərfinə daxil ediləcək. Bu haqda bu gün, 19 yanvar tarixində Bakuplus.az ATV-yə istinadən məlumat verir.
İlkin mərhələdə ürək-damar sistemləri xəstəlikləri, daha sonra həzm problemi ilə bağlı xəstəliklər, üçüncü mərhələdə isə tənəffüs sistemi xəstəliklərinin dərman təminatı İcbari Tibbi Sığorta zərfinə daxil ediləcək. Bu məqsədlə apteklərlə müqavilələrin bağlanılması nəzərdə tutulub.
İcbari Tibbi Sığorta üzrə Dövlət Agentliyindən bildirildi ki, layihə razılaşdırılma üçün aidiyyəti qurumlara təqdim edilib. Tibbi Sığorta haqqında qanuna dəyişiklik edilməsi layihəsi təsdiq olunduqdan sonra ictimaiyyətə bu barədə məlumat veriləcək.
Səhiyyə Nazirliyi tərəfindən verilən açıqlamaya görə, bundan sonra apteklərdən elektron reseptsiz dərman əldə etmək mümkün olmayacaq. Burada yalnız tarif şurasının təsdiqlədiyi və dövlət qeydiyyatına alınan dərman vasitələri qeyd olunacaq. Elektron resept dövlət tərəfindən pulsuz dərmanlarla təmin olunan vətəndaşlara şamil edilməyəcək.
