Bakının Binəqədi rayonunda yerləşən Azərbaycan Uşaqlar Birliyinin sığınacağından nəvələrini götürmək istəyən qadınla birliyin sədri arasında mübahisə yaşanıb. Bu haqda bu gün, 5 dekabr tarixində Bakuplus.az birliyin sədri Kəmalə Ağazadəyə istinadən məlumat verir.
Kəmalə Ağazadə bildirib ki, 3 həftə əvvəl Fizzə Kazımova adlı qadın nəvələri olan iki azyaşlı qız uşağını sığınacağa yerləşdirib. Nənənin sözlərinə görə, qızı və sevgilisi narkotik aludəçiləridir və onlarla bir evdə qalması uşaqların həyatı üçün təhlükəlidir. Qızlar sığınacağa yerləşdirilib, aidiyyəti orqanlara məlumat verilib. Uşaqların atası vəziyyəti öyrəndikdən sonra ərizə ilə məhkəməyə müraciət edərək uşaqların ona verilmə iddiasını qaldırıb.
4 yanvar tarixində isə nənə sığınacağa gələrək uşaqları aparmaq istəyib. O qeyd edib ki, qızı onun evini yandırmaqla hədələyib, uşaqları axşama kimi qaytarmağı tələb edib.
Ağazadə izah edib ki, qızların qəyyumluq orqanlarının icazəsi olmadan geri qaytarılması mümkün deyil və dövlət orqanlarının işçilərinin Yeni il bayramından sonra işə qayıtmasını gözləmək lazımdır.
Bir müddət sonra sığınacağa uşaqların anası da yaxınlaşıb və onun tərəfindən daha böyük münaqişə yaradılıb.
Hadisə yerinə polis əməkdaşları cəlb olunublar. Polislər qadınlarla 1 saat söhbət aparmaqlarına baxmayaraq, sonuncular polis əməkdaşlarına və polis avtomobilinə hucum ediblər, avtomobilin süşələrini qırıblar və polis əməkdaşlarına fiziki xəsarətlər yetiriblər. Hər iki şəxs Binəqədi 4 saylı polis bölməsinə aparılıb. Hazırda araşdırmalar davam edir.
