“Yaşlı insanlar iş fəaliyyətlərini dayandırandan sonra həyatlarını elə qurmalıdırlar ki, depressiyaya düşməsinlər. Qərb ölkələri ilə müqayisədə Azərbaycanda yaşlı əhali demək olar ki, uzaq turistik səyahətlərdə az olurlar, daha çox ev şəraitində qalırlar, qapanırlar.”
Bu fikirləri Bizim.Media-ya açıqlamasında sosioloq Ağasəlim Həsənov bildirib.
Sosioloq deyib ki, bütün bunlar dolayısı ilə ahılların səhhətlərində müxtəlif problemlər yaradır, həyat sanki onlar üçün sönmüş olur: “Bəlkə min bir istəkləri, arzuları var, amma hansısa maddi çatışmazlıq ucbatından, və ya fiziki imkanların məhdudluğu səbəbindən öz istəklərini gerçəkləşdirə bilmirlər. Bu da sonda təbii ki, yaşlı əhalinin sosial-psixoloji durumuna pis təsir edir. Asudə vaxtını səmərəli təşkil edə, gerçəkləşdirə bilməyən yaşlı fərdlər öz ölümünü gözləyən xəstə kimi həyatlarına davam edirlər”.
Ağasəlim Həsənov bildirib ki, xarici ölkələrdə yaşlı təbəqənin qayğıları ilə məşğul olan işçilər var: “Düşünürəm ki, Azərbaycanda bununla bağlı çox ciddi boşluq var. Məsələn, Kanadada sosial iş sahəsi çox inkişaf edib. Bəzi sosial işçilər var ki, onlar müxtəlif yaş kateqoriyasında olan insanlarla daim işləyirlər və bunun müqabilində yüksək maaş alırlar. Yaşlı əhalinin daimi psixoloji yardıma, dəstəyə ehtiyacı var. Sosial işçilər yaşlı insanların ehtiyacları ilə maraqlanır və onların günlərini daha səmərəli keçirmələrinə kömək edirlər. Azərbaycanda da bu təcrübədən istifadə etmək olar”.
