Bu gün Sovet İttifaqı Qəhrəmanı, məşhur kəşfiyyatçı Rixard Zorgenin anım günüdür.
Rixard Zorge 4 oktyabr 1895-ci ildə Bakının Sabunçu qəsəbəsində, alman əsilli neftçi-texnik Adolf Zorgenin ailəsində anadan olub. Uşaqlıq illərini Bakıda keçirən kəşfiyyatçının ailəsi sonradan Almaniyaya köçüb.
Birinci Dünya müharibəsində iştirak edən Zorge yaralanaraq ömürlük axsaq qalıb. Daha sonra kommunist ideyalarına qoşulan Rixard 1924-cü ildə SSRİ-yə köçüb, 1929-cu ildə isə sovet kəşfiyyatı ilə əməkdaşlığa başlayıb.
O, jurnalist adı altında müxtəlif ölkələrdə fəaliyyət göstərib. Yaponiyada "Ramzay" təxəllüsü ilə işləyən Zorge Almaniyanın diplomatik dairələrinə daxil olmağı bacarıb.
Onun ən mühüm xidmətlərindən biri Almaniyanın SSRİ-yə hücum edəcəyi tarixi əvvəlcədən müəyyənləşdirməsi olub. Zorge 1941-ci il mayın 30-da Moskvaya göndərdiyi məlumatda hücumun iyunun 22-də başlayacağını bildirib. Bu xəbər müharibənin gedişində mühüm əhəmiyyət daşıyıb.
Lakin həmin il oktyabrın 18-də Yaponiyada həbs edilən kəşfiyyatçı 1944-cü il noyabrın 7-də edam olunub. Son nəfəsində yapon dilində "Sovet İttifaqı! Qırmızı Ordu! Kommunizm!" deyə qışqırıb.
Maraqlıdır ki, Zorge edam olunana qədər SSRİ onun sovet kəşfiyyatçısı olduğunu rəsmən tanımayıb. Yalnız 1964-cü ildə, ölümündən 20 il sonra ona Sovet İttifaqı Qəhrəmanı adı verilib.
Qeyd edək ki, əfsanəvi kəşfiyyatçının adına Bakıda park, küçə və məktəb var.
