Bakının Suraxanı rayonu, Bülbülə gölünün ətrafında abadlıq işləri bir aydan çoxdur ki, davam edir. Bu haqda bu gün, 27 dekabr tarixində Bakı Gündəliyi Facebook səhifəsi məlumat verib.
Yerli sakinlərə istinadən işlərin sifarişçisi Bakı Abadlıq Xidmətidir. Orada genişmiqyaslı işlərin məqsədi gölün ətrafında bulvarın salınmasıdır.
Bundan əvvəl sakinlər gölün müxtəlif tullantılardan təmizlənməsi üçün həm aidiyyəti dövlət orqanlarına, həm də media qurumlarına müraciət ediblər.
Bakı Abadlıq Xidmətindən bildirilib ki, göl çirkab sulardan təmizlənir.
"Suyun təmizlənməsi üçün "Azərsu" ASC ilə birlikdə işlər aparılacaq. Birinci mərhələdə göl təmizləndikdən sonra ətrafında gəzinti, velosiped, skuterlər üçün yol salınması planlaşdırılır. İkinci mərhələdə isə yaşıllıq zonasının salınması nəzərdə tutulub", - qurumdan qeyd edilib.
Bakının yeni Baş Planının layihəsində Bülbülə gölünün ətrafında yaşıllıq zolağının yaradılması nəzərdə tutulur.
