Paytaxtda insanların dincəlməsi üçün kifayət qədər parklar salınıb.
Bizim.Media-nın məlumatına görə, bu parklarda uşaqların əyləncəsi nəzərə alınmayıb. Bir sözlə, Bakıda bir çox parklarda attraksionlar ya yoxdur, ya da işləmir.
Bu da həm valideynlərin, həm də uşaqların narazılığına səbəb olur.
Bəs görəsən, niyə parklarda attraksionlara rast gəlinmir? Onların fəaliyyəti nəyə görə dayandırılıb?
Məsələ ilə bağlı Fövqəladə Hallar Nazirliyindən bildirilib ki, 2024-cü ilin ötən dövrü ərzində Bakı şəhərində yerləşən müxtəlif məkanlarda aparılmış yoxlamalar nəticəsində ümumilikdə 18 ədəd mexanikləşdirilmiş attraksionun istismarı ilə bağlı nöqsanlar aşkar edilib. Bu səbəbdən həmin attraksionların fəaliyyəti dayandırılaraq qanunvericiliyin tələblərinə uyğun müvafiq tədbirlər görülüb.
Dənizkənarı Bulvar İdarəsindən isə bildirilib ki, bulvar ərazisindən yığışdırılan attraksionlar müasir tələblərə cavab vermir və istismar müddətini başa vurub. Köhnəlmiş attraksionların yığışdırılması həm də təhlükəsizlik baxımından vacib idi. Onların yeni nəsil attraksionlarla əvəzlənməsi istiqamətində işlər aparılır.
