Bakının Səbail rayonunda 339 saylı uşaq bağçasından qaçan uşağın hekayəsinin davamı üzə çıxıb. Bu haqda bu gün, 12 avqust tarixində Bakuplus.az Baku TV-yə istinadən məlumat verir.
7 avqust tarixində saat 16:15 radələrində adıçəkilən rayonda yerləşən 339 saylı uşaq bağçası əməkdaşlarının səhlənkarlığına görə uşaq bağçanı tərk edərək küçədə nəzarətsiz qalıb. Onu götürməyə gələn ana övladını küçədə görərkən avtomobilinə mindirib. Daha sonra qadın bağçaya gedib.
Bağçaya gələn Jalə Abdulova tərbiyəçidən uşağın harada olduğunu soruşub. Bağça əməkdaşları isə uşağın digər valideynləri ilə getdiyini bildiriblər. Məsələ ilə bağlı mübahisə yaranıb, uşağın anası isə bağça rəhbərliyini məsələni ictimailəşdirəcəyi ilə hədələyərək 15.000 manat pul tələb edib. O, bunu övladını özəl bağçaya vermək istəməsi ilə əlaqələndirib və dövlət bağçasının rəhbərliyindən pulun ödənilməsini istəyib.
Məsələ ilə bağlı Daxili İşlər Nazirliyindən (DİN) bildirilib ki, bağça əməkdaşları və uşağın valideyni polis bölməsinə dəvət olunublar, işçilərlə söhbət aparılıb, hər iki tərəfdən izahat götürülüb.
Bakı Şəhəri üzrə Təhsil İdarəsində də hadisədən xəbərdardırlar.
“Görülmüş tədbirlər nəticəsində qısa müddətdə uşaq geri qaytarılıb. Operativ olaraq məsələ araşdırılıb və tərbiyəçi-müəllim haqqında tənbeh tədbiri görülüb. Həmçinin valideynə məlumat verilib və valideynlə söhbət aparılıb. Təəssüf ki, valideyn adekvat münasibət göstərməyib, qanunsuz tələblərlə çıxış edib. Onu da qeyd edək ki, uşaqların mühafizəsi və işçilərin məsuliyyətinin daha da artırılması ilə bağlı müvafiq tədbirlər görülüb”, – qurumdan bildirilib.
