Xətai rayonunda 4 binanın həyəti bərbad vəziyyətdədir. Bu haqda bu gün, 6 iyul tarixində Bakuplus.az İctimai TV-yə istinadən xəbər verir.
Söhbət Babək prospektində yerləşən binalardan gedir. Burada nə uşaqlar oynaya, nə də böyüklər dincələ bilirlər. Ağaclar quruyub, sınıb və onlara aylardır baxan yoxdur. Uşaq attraksionları da baxımsız vəziyyətdədir.
“Antisanitar vəziyyətdir, şüşə parçaları, oturacaq yoxdur, işıq yoxdur. Uşaqlarımız bu şəraitdə oynayırlar. Bizim istəyimiz odur ki, buralar yüngül də olsa, abadlaşdırılsın”, - deyə sakinlər şikayət edirlər.
“Mənzil Təsərrüfat Birliyi tərəfindən hazırda orada işlər gedir. Təmizlik yaradılacaq və tərəfimizdən nəzarətdə saxlanılacaq. Həmin uşaq bağçası da dövlət proqramına salınıb. Sadəcə indi orada məcburi köçkünlər yaşayırlar. Onlar köçürüləndən sonra müvafiq işlər görüləcək”, - deyə Xətai RİH-nin şöbə müdiri Pənah İmanov bildirib.
