Paytaxtın Səbail rayonu, Badamdar qəsəbəsində ağaclıq ərazinin hasarlanması sakinlərin narazılığına səbəb olub. Bu haqda bu gün, 16 mart tarixində Bakuplus.az ATV-yə istinadən xəbər verir.
Belə ki, bir zamanlar açıq ərazi olan ağaclıq sahə bir neçə ay əvvəl hasarlanıb. Sakinlərin şikayətindən sonra hasarlar sökülüb, ancaq daha sonra yenidən eyni hal baş verib. Burada yaşayanlar bildirirlər ki, ağacların kəsiləcəyindən və ərazidə bina tikiləcəyindən narahatdırlar.
Mənzil-kommunal sahəsindən məsələ ilə bağlı bildiriblər ki, ərazi özəl mülkdür. Bu səbəbdən onlar heç bir müdaxilə edə bilməzlər. Sahənin Fərhad adlı sahibi isə vurğuladı ki, məhkəmənin qərarı ilə həmin ərazi hasara alınıb və orada fərdi yaşayış evi tikiləcək. Ağacları isə o özü əkib və kəsməyi planlaşdırmır.
