Bakı Avropa Liseyinin köhnə binası sökülür. Bu haqda bu gün, 5 aprel tarixində Bakuplus.az ATV-yə istinadən xəbər verir.
Yasamal rayonu, Süleyman Tağızadə küçəsində yerləşən binanın söküntü işlərinə artıq start verilib. Ancaq ərazidə bununla bağlı təhlükəsizlik tədbirləri görülməyib. Belə ki, avtomobil yolunun tam yanında yerləşən və insanların hərəkət etdiyi əraziyə yaxın olan binada hasarlanma işləri aparılmayıb. Bu da sakinlər üçün ciddi təhlükə yaradır.
Yasamal rayon İcra Hakimiyyətindən bildirilib ki, prosesə Elm və Təhsil Nazirliyi baxır. Sonuncu isə bildirib ki, məsələnin onlara aidiyyəti yoxdur.
Təhlükəsizlik məsələləri üzrə ekspert Elmar Nürəliyev də təhlükəsizlik tədbirlərinin görülməsinin zəruri olduğunu vurğulayıb. O, bu cür addımların bədbəxt hadisə riskini azaltdığını qeyd edib.
