Bakıda sənədsiz evlərlə bağlı yeni işçi qrupu yaradılıb. Bu haqda bu gün, 6 fevral tarixində Bakuplus.az ARB Xəbər-ə istinadən xəbər verir.
Paytaxt ərazisində 600.000-ə yaxın sənədsiz ev var. Belə evlər daha çox Bakıətrafı qəsəbələrdə yerləşir. Sakinlər deyirlər ki, evlərinin sənədlərinin olmaması onların işini xeyli çətinləşdirir.
“60 ildir çıxarış yoxdur. Sayğaclar var, amma sənəd yoxdur. Ailə üzvlərimizi evdə qeydiyyatdan keçirə bilmirik”, – deyə sakinlər şikayət edirlər.
Sənədsiz evlərə çıxarışın verilməməsinin əsas səbəblərindən biri evlərin fərqli təyinatlı torpaqlarda tikilməsidir.
Bu kimi problemlərin həll olunması üçün Əmlak Məsələləri Dövlət Agentliyi tərəfindən işçi qrupu yaradılıb.
“İşçi qrupun yaradılmasında əsas məqsəd torpaqların təyinatının müəyyən olunması və ərazilərdən keçən kommunikasiya xətlərinin fəaliyyətdə olub-olmamasını müəyyən etməkdir”, – deyə əmlak eksperti Fazil Fərzəliyev qeyd edib.
Onun sözlərinə görə, qadağan olunmuş ərazilərdə tikilmiş əmlaklar, yəni yüksəkgərginlikli elektrik naqillərinin altında tikilmiş və yaxud su, neft borusu ətrafında, dəmiryol xətlərinin kənarında tikilmiş əmlaklara çıxarışlar verilməyəcək. Lakin həmin əmlakların yaxın gələcəkdə kompensasiya verilərək köçürülməsi gözləniləndir.
