Dayanacaqlarda yapışdırılan elanlar qanunidirmi? Bu haqda bu gün, 28 dekabr tarixində Bakuplus.az ATV-yə istinadən xəbər verir.
Avtobus dayanacaqlarının, demək olar ki, bir çoxunda bu cür reklam və elanlar yapışdırılıb: kurs elanları, iş elanları, kirayə ev və sairə. Bu isə şəhərin görünüşünə xələl gətirir.
Baxmayaraq ki, dayanacaqların üzərində reklam və ya elan yerləşdirmək üçün xüsusi yer ayrılıb, insanlar ödəniş etməmək üçün başqa yollara əl atırlar.
Bakı Şəhər Mənzil Kommunal Təsərrüfat Departamentindən bildirildi ki, dayanacaqlar departamentin əməkdaşları tərəfindən mütəmadi olaraq təmizlənir, ancaq sakinlər elanları yapışdırmağa davam edirlər.
Qanuna görə, əmlakın zədələnməsi və yararsız hala salınması qadağandır. Bu halda fiziki şəxslər 300-500, vəzifəli şəxslər 500-2000, hüquqi şəxslər isə 5000-10.000 AZN-dək cərimə edilirlər.
