Bakının Suraxanı rayonu, Hövsan qəsəbəsi, Q.Quliyev küçəsi, 24 ünvanında yerləşən binada mənzilin içərisindən qaz xətti keçir. Bu haqda bu gün, 23 oktyabr tarixində Bakuplus.az Bizim.Media-ya istinadən məlumat verir.
Bu ünvanda qanunsuz artırmalar edilib və nəticədə boruların bir hissəsi mənzillərin içərisində qalıb. Bina sakinlərinin sözlərinə görə, bu problem uzun illərdir ki, mövcuddur, amma rəsmi qurum bu məsələyə nəzarət etmir.
Qaz xətləri birinci mərtəbədəki mövcud qeyri-yaşayış sahələrindən də keçir.
Sakinlər bununla bağlı dəfələrlə “Azəriqaz” İB ilə əlaqə saxladıqlarını deyirlər. Hətta bu məsələnin araşdırılması üçün akt da tərtib edilib. Amma nə əraziyə, nə də mənzillərə baxış keçirilməyib, problemin həlli üçün heç bir addım atılmayıb.
Məsələ ilə bağlı “Azəriqaz” İB-nin nə baş ofisi ilə, nə də mətbuat katibi ilə əlaqə saxlamaq mümkün olmayıb.
