Paytaxtın Nizami rayonu, Rizvan Teymurov küçəsində ağac binanın divarında kök atıb. Problem ancaq bununla bitmir, eyni zamanda istismar müddətini başa vuran binanın fasadı da qoparaq tökülməyə başlayıb və divarda çatlar əmələ gəlib. Bu haqda bu gün, 17 iyul tarixində Bakuplus.az ATV-yə istinadən məlumat verir.
Binanın daxilində vəziyyət daha acınacaqlıdır. İçəridə həm antisanitar vəziyyət hökm sürür, həm də pilləkənlər sıradan çıxıb. Sakinlər deyirlər ki, burada ölümü gözə alaraq yaşayırlar. Çünki binanın uçması an məsələsidir.
“Demək olar ki, pilləkənlər yox vəziyyətindədir. Hər il ordan-burdan evləri təmir edirik, yuxarıdan su axır, ayaqyoluda artıq ağaclar, meyvə ağacları bitir. Siçanlar o gün qonşu uşağının ayağını, əlini yeyib. Körpə uşaqdır, adam beşikdə qoyub çölə çıxa bilmir”, – yerli sakin deyib.
Məsələ ilə bağlı 1 saylı xüsusi təyinatlı Mənzil Kommunal Təsərrüfat Birliyindən bildirildi ki, sözügedən bina qəzalı binalar siyahısındadır. Hətta sakinlərin buradan köçürülməsi üçün onların hər birinə Hövsan qəsəbəsində mənzillər də təklif edilib. Buna baxmayaraq, sakinlər təklifi rədd ediblər və yalnız Nizami rayonunda mənzil almaq istədiklərini bildiriblər. O da qeyd olundu ki, yalnız həmin bina hər hansı bir tikinti şirkəti tərəfindən alınarsa, bu, mümkün ola bilər. Bir sözlə, sakinlər hələ bir müddət bu vəziyyətdə yaşamalı olacaqlar.
