Nazirlər Kabineti Aparatının İşlər İdarəsinin müdiri Hikmət Xəlilov polisə müraciət edərək bildirib ki, aprelin 6-da səhər saat 08:00 radələrində onun avtomobilinə hücum olub. Bu haqda bu gün, 8 aprel tarixində Bakuplus.az məlumat verir.
Hikmət Xəlilov qeyd edib ki, tanışı Vahid Xələfov səhər saatlarında Xəzər rayonunun Şağan kəndində onun idarə etdiyi “Lexus” markalı, 10 ** 200 dövlət qeydiyyat nişanlı avtomobilin qarşısını kəsib. O bildirib ki, həmin şəxs əlindəki silaha bənzər əşya ilə avtomobili vurub, hədə-qorxu ilə pul tələb edib.
Hadisə ilə bağlı araşdırma başlanılıb. Vahid Xələfov Daxili İşlar nazirliyinin əməkdaşları tərəfindən saxlanılıb.
Verilən məlumata görə, şikayət olunan Vahid Xələfov tikinti şirkətinin sahibidir. Tərəflər arasında tikinti məsələləri ilə bağlı münaqişə və məhkəmə çəkişmələri uzun müddətdir ki, davam edir.
Bundan əvvəl bütün məhkəmə instansiyaları, eləcə də Ali Məhkəmə Hikmət Xəlilovla Vahid Xələfovun mübahisəsində Hikmət Xəlilovun xeyrinə qərar çıxarıb.
Hikmət Xəlilov 2019-cu ildə Baş Nazir Əli Əsədovun müvafiq Sərəncamı ilə Nazirlər Kabineti Aparatının İşlər müdiri təyin edilib.
