Dekabrın 1-dən 5-dək Muzey Mərkəzinin Sərgi Qalereyasında beynəlxalq müsabiqələr laureatı, Rəssamlar İttifaqının üzvü Nərgiz Quliyevanın “Rənglərdə yaşayan ömür” adlı fərdi sərgisi keçiriləcək. Bu haqda bu gün, 27 noyabr tarixində Bakuplus.az məlumat verir.
Sərginin rəsmi açılış mərasimi dekabrın 1-də saat 18:00-da baş tutacaq. Sərgidə Nərgiz Quliyevanın Heydər Əliyev şəxsiyyəti və fəaliyyətinin təsiri ilə yaradılmış yeni əsərləri nümayiş olunacaq. Nərgiz Quliyevanın əsərləri ilə yanaşı, gənc rəssamların – “Nərgiz Art Studio”nun tələbələrinin 40-a yaxın əsəri də təqdim olunacaq.
Sərginin keçirilməsi ideyasının müəllifi bu ilin sentyabrında qəflətən dünyasını dəyişən Milli Məclisin Mədəniyyət komitəsinin keçmiş sədri Qənirə Paşayeva idi. Qənirə Paşayevanın xatirəsinə ehtiram əlaməti olaraq sərgi məhz onun tövsiyə və istəkləri əsasında tərtib edilib.
“Rənglərdə yaşayan ömür” Nərgiz Quliyevanın Azərbaycanda üçüncü sərgisidir.
Sərginin açılışı: 1 dekabr, 2023 saat 18:00 (giriş dəvətnamə ilə). Sərginin iş rejimi: 2-5 dekabr 2023 (giriş sərbəstdir). İş saatları: 10:00-18:00.
