Bakının Suraxanı rayonunun Yeni Günəşli qəsəbəsinin “V” massivində yerləşən 13V saylı binanın sakinləri mənzillərinin bir neçə nəfərə satıldığından şikayətçidirlər. Bu haqda bu gün, 17 aprel tarixində Bakuplus.az Baku TV-yə istinadən məlumat verir.
Sakinlərin sözlərinə görə, “Arko” MMC ilə “Badu-Kübə” MTK arasındakı ədavət onların evsiz qalmasına səbəb olub.
“Məhkəməni uduzmuşam. Gözləyirəm ki, məni gəlib nə vaxt küçəyə atacaqlar”, - zərərçəkən deyib.
Məsələ ilə bağlı ittiham olunan “Badu-Kübə” MTK-nın rəhbəri Ədalət Qəmbərov açıqlama verib: “70 ev var ki, yaşaya bilmirlər. Digər tərəfin xeyrinə qərar verirlər. Mən işlə bağlı sənədləri də təqdim edirəm, rəsmi teleqram da vururam, rəsmi müraciət edirəm, amma xeyri yoxdur. Elə qanunlaşdırıblar ki, bu camaatın evlərini əllərindən alırlar. Camaat evində otura bilmir. 70-ə yaxın mənzil bu saat hamısı pis vəziyyətdədir.Rəhilə Əsədullazadə həmin bu saxta müqavilə ilə verir, məhkəməyə gəlir, camaatı bir-bir evindən çıxarır”, - Qəmbərov deyib.
Ədalət Qəmbərov binanı sözügedən MTK-nın tikdiyini və heç bir ortaqlıqdan söhbət getmədiyini bildirdi.
“Məhkəmə qətnaməsi var ki, “Badu-Kübə”nin ekspluatasiyası 2005-ci ildən alınıb mənə verilsin. Bu günə qədər vermir. Ədalət Qəmbərov bir mənzili 4-5 adama satır. Bizim şirkətimizə 5 min kvadratmetr qeyri-yaşayış sahəsi borcludur. Eyni zamanda 925 min manat pul borcludur”, - Rəhilə Əsədullazadə - “Arko” MMC-nin direktoru da öz növbəsində bildirib.
Adıçəkilən qalmaqallı şirkətlərlə bağlı şikayətlərin sayı-hesabı yoxdur. Biri deyir ki, mənzil mənimdir, satmışam, digəri deyir ki, mənzil mənimdir, mən də başqasına satmışam. Nəticədə əziyyəti pulunu verib ev alan sakinlər çəkirlər. Sakinlər aidiyyəti orqanlara müraciət etsələr də, heç bir nəticə yoxdur.
