“Müştərilərimizin 90 faizi təəccüblə qarşılayır. Xanım və təkər işi”, – deyən təkərçi Ülviyyə xanım atasını uşaq yaşlarında itirib. O deyir ki, 9 bacı-qardaş olan başçısız ailənin ehtiyaclarını qarşılamaq üçün yeniyetmə yaşlarından işləməyə məcbur olub. 16 yaşından başlayaraq ustaların yanında bu işin sirlərini öyrənməyə başlayıb. İndi 39 yaşı olan qadının öz biznesi var. Bu haqda bu gün, 13 yanvar tarixində Bakuplus.az ARB Xəbər-ə istinadən məlumat verir.
“Azərbaycanda ilk və tək xanım təkər ustası mənəm və özümlə qürur duyuram. Azərbaycanda ilk və tək “korobka” (sürətlər qutusu) üzrə qadın usta Nüşabə xanımı tanıdıqdan sonra özümə daha da inandım.
İnamla bu iş üzrə addım atmağa başladım. Xanım olduğuma görə bizimlə işləmək istəməyənlər də çox oldu. “Bacarmayacaqsan” deyənlərə mən hal-hazırda sübut etdim ki, bacarıram. Mən bu sənəti, işimi sevirəm. Bura canımı, ruhumu, sevgimi, hər şeyimi qoyuram. Artıq bizim yetərincə müştəri bazamız var. Bizim xanım olduğumuza görə deyil, gördüyümüz işə görə buradadırlar”, – deyə usta və sahibkar Ülviyyə Əliyeva bildirib.
Ülviyyə bu işi öyrənmək istəyən digər xanımlara da kömək etməyə hazır olduğunu deyib.
