Hacı Mazan kimi tanınan iş adamı Ramazan Zeynalovun yaşadığı binada lifti özəlləşdirməsi ilə bağlı məhkəmə qərarı açıqlanıb. Bu haqda bu gün, 18 yanvar tarixində Bakuplus.az Oxu.az-a istinadən məlumat verir.
Hacı Mazan blokda yerləşən liftlərdən birinə xüsusi kod qoyub. Nəticədə liftdən yalnız onun ailə üzvləri istifadə edə bilib.
İş adamının bu hərəkəti və özünü və ailə üzvlərini xüsusi şəxs hesab etməsi, qonşuları təhqir etməsi sonuncuların ciddi narazılığına səbəb olub. Sakinlər bildiriblər ki, Zeynalov işləməyən lifti öz hesabına təmir edib. Bundan sonra o, bəzi sakinlərə 1000 manata liftdən istifadə etmək üçün kart təklif edib.
Nəsimi Rayon Məhkəməsi R.Zeynalovun Nəsimi rayonu, Şövqiyar Abdullayev küçəsi, 23 ünvanında yerləşən binada digər sahə mülkiyyətçilərinin ümumi əmlakı olan liftdən istifadəsinə yaratmış olduğu bütün qadağa və maneələrin qeyri-qanuni olduğu qərarına gəlib.
Daha öncə Hacı Mazan mənzil satdığı vətəndaşın şəxsi evinə hücum edib onu döyərək qalmaqalın mərkəzində olmuşdu.
