Bakıda və ölkənin digər bölgələrində “Yaradıcı həftə” çərçivəsində Mədəniyyət Nazirliyinin təşkilatçılığı ilə noyabr və dekabr aylarlında müxtəlif tədbirlər həyata keçiriləcək. Bu haqda bu gün, 23 noyabr tarixində Bakuplus.az nazirliyə istinadən məlumat verir.
Noyabrın 28-30-da Heydər Əliyev Mərkəzində kreativ məhsulların və yaradıcı sənaye nümayəndələrinin fəaliyyətinin tanıdılması məqsədilə “Mədəniyyət və Yaradıcı Sənayelər Sərgisi” (MY EXPO 2023) keçiriləcək. Sərgidə kino, animasiya, musiqi, “cultech” (mədəniyyət sahəsində startaplar), “gametech” (oyun texnologiyaları), dəb, dizayn kimi yaradıcı klasterləri, eləcə də yaradıcı məkan və regionlar bir araya gətiriləcək.
Həmin tarixlərdə Heydər Əliyev Mərkəzində “Mədəniyyət və Yaradıcı Sənayelər Forumu” təşkil olunacaq.
Həmçinin noyabrın 27-də Yarat Müasir İncəsənət Məkanında “Yaradıcı müzakirələr” (“Creative Talks”) təşkil olunacaq. Tədbirlər seminar, ustad dərsləri, tanınmış şəxslərlə görüşlər və təlimlərdən ibarət olacaq. Qeydiyyatdan keçmək istəyənlər talks.creative.az səhifəsində anket doldurmalıdırlar.
Bununla yanaşı, dekabrın 1-də ADA Universiteti, Azərbaycan Dövlət Mədəniyyət və İncəsənət Universiteti, Bakı Dövlət Universiteti, Azərbaycan Dövlət İqtisad Universiteti, Azərbaycan Dillər Universiteti və Azərbaycan Texniki Universitetində tələbələrə Mədəniyyət Nazirliyinin dəstəyi ilə çəkilmiş filmlər nümayiş etdiriləcək.
