Bakının Səbail rayonunda yerləşən 162 saylı tam orta məktəbin istinad divarı hər an uçma təhlükəsi ilə üz-üzədir. Belə ki, istinad divarının alt hissəsi təmamilə dağılıb. Divarın digər tərəfində isə sakinlərin mənzilləri yerləşir və oradan daim sakinlər hərəkət edirlər. Bu haqda bu gün, 13 yanvar tarixində Bakuplus.az ATV-yə istinadən məlumat verir.
Sakinlər deyirlər ki, ara küçə dar olduğundan gediş-gəliş üçün məcburən bu ərazidən istifadə edirlər. Küləkli və yağışlı havalarda vəziyyət daha gərgin olur. Hündürlüyü təxminən 7 metr olan istinad divarlarına dayaq üçün borular basdırılsa da, bu, uçma təhlükəsindən sığortalamır.
Səbail RİH və FHN-in əməkdaşları əraziyə gələrək istinad divarına müvafiq baxış keçiriblər. Mütəxəssislər bildirdilər ki, yaxın zamanlarda istinad divarlarında yenidən təmir-bərpa işləri aparılacaq.
