Bakının 27 nömrəli tam orta məktəbində uşaq döyülüb. Bu haqda bu gün, 21 yanvar tarixində Oxu.az məlumat verib.
Uşağın valideyni sosial şəbəkələrdə bildirib ki, övladı iki uşaq tərəfindən planlı şəkildə döyülüb: “Yanvarın 13-də oğlumla digər sinfin şagirdləri arasında münaqişə baş verib. Daha sonra məktəbin müəllimləri onları barışdırmağa çalışsalar da, digər şagird oğlumu öldürməklə hədələyib. Məsələ barədə dəfələrlə məktəbə gedib narahatlığımı bildirdim. “Hər şey qaydasındadır”, - deyib məni yola saldılar. Bir neçə gün əvvəl oğlumu hədələyən şagird qardaşı və yaxınları ilə oğlumu vəhşicəsinə döyüblər”.
Məktəbdən verilən məlumata görə, 13 yanvar tarixində 8-ci və 6-cı sinif şagirdləri arasında mübahisə yaranıb. Məktəb rəhbərliyi onları barışdırmağa çalışsa da, 18 yanvar tarixində tənəffüs zamanı 6-cı sinif şagirdi qardaşı ilə 8-ci sinif şagirdinə yaxınlaşaraq onu döyüblər.
Oğlanın valideyni polisə müraciət edib. Hazırda məsələ ilə bağlı araşdırma aparılır.
