Bakıda yeni binaların sakinləri istədikləri internet provayderindən istifadə edə bilmirlər. Bu haqda bu gün, 29 dekabr tarixində Bakuplus.az Baku TV-yə istinadən xəbər verir.
Son günlər mülkiyyətçilər sosial şəbəkələrdə internet provayderi seçimindən məhrum olduqlarını bildirirlər. Belə ki, MTK-lar bəzi hallarda yalnız 1 provayderin istifadəsinə icazə verir. Bu da sakinlərin narazılığına səbəb olur.
Hüquqşünas Emil Aslanov bildirir ki, binada bir neçə provayderin MTK-da fəaliyyət göstərməsinə şərait yaradılmalıdır.
Digər hüquqşünas Ana Qasımlının sözlərinə görə isə öncə sakinlər hansı provayderi seçmək istədiklərinə qərar verməlidirlər. Daha sonra MTK-ya müraciət edilməlidir. Əgər sonuncu digər provayderlərin gəlməsinə maneçilik törətsə, bu, qanun pozuntusu sayılır.
“İlk növbədə tələb-təklif məsələsidir. Bir binada 3-4 nəfər başqa provayderi istəyirsə, təbii ki, həmin provayder ora gəlməyəcək. Çünki bu onlar üçün sərfəli deyil”, – deyə o əlavə edib.
