Bakıda yaşayan xanımı ruhi xəstə olan şəxs izləyir. Bu səbəbdən gənc qız narahatdır. O, artıq 3 gündür həmn şəxs tərəfindən evinə qədər izləndiyini deyir. O bildirir ki, polisə bu barədə məlumat verib, ancaq polis: “Nə edim? Psixi problemi, dəlilik kağızı var. Biz nə desək də, anlamır”, – deyə əsas gətirməyə çalışır. O zaman sual yaranır. Bəs belə olan təqdirdə qanun nə deyir? Kimin psixi problemə dair həkim kağızı varsa, küçədə istədiyini edə bilər? Problemin həlli asayiş keşikçilərinin yoxsa həkimlərin üzərinə düşür? Valideyn himayəsində olsalar da, ətrafa qorxu və təşviş yaradan bu cür psixi xəstələrlə bağlı hansı tədbirlər görülə bilər? Məsələ ilə bağlı Bakuplus.az ATV Xəbər-ə istinadən reportaj təqdim edir.
Psixiatriya xəstəxanasının şöbə müdiri Vüqar Yusifov deyir ki, psixi xəstəni könüllü şəkildə xəstəxanaya yerləşdirmək mümkün olmadıqda yaxın qohumlar və yaxud qonşular yaşadıqları ərazi üzrə müvafiq olaraq ərizə ilə məhkəməyə müraciət etməlidirlər: “Bu ərizədə 3 haldan biri öz əksini tapmalıdır: psixi xəstə özünə və sosial mühitə, ətrafa təhlükəli olduğu təqdirdə təxirəsalınmaz psixiatriya yardımının göstərilməməsi gələcəkdə xəstənin psixi vəziyyətinə və yaxud da sağlamlığına bərpası olmayan zərərlər yetirməsinə və ya gələcəkdə onun müalicəsinin imkansız edilməsi və eyni zamanda psixi xəstəliyin xəstənin özünün həyatın tələbatlarını yerinə yetirə bilməməsinə gətirib çıxara bilər”.
Həmçinin təcili tibbi yardım personalının bu sahə üzrə mütəxəssisin, xəstənin valideynlərinin, himayəçisinin icazəsi və yaxud da xəstənin özünün belə razılığı olmadan da onu müayinə etmək və psixiatrik stasionara yerləşdirmək ixtiyarı var.
Millət vəkili İlham Məmmədov da deyir ki, belə hallarda polisin də ətrafa təhlükə yaradan xəstəni məcburi qaydada psixiatrik stasionara cəlb etməyə qanuni haqqı var. Amma buna qədər müvafiq prosedurlar icra edilməlidir. “Sahə həkimi və yaxud sahə polisi işçiləri xəstə ilə profilaktik söhbətlər aparmalıdırlar. Əgər bu effekt vermirsə, o, məcburi müalicəyə cəlb olunur”.
Məsələ ilə bağlı Daxili İşlər Nazirliyindən ümumi məlumat verilməyib. Konkret faktla əlaqədar bildirildi ki, həmin şəxsin valideyni polis orqanına dəvət olunaraq, izahatı alınıb və 2-ci qrup əlil olmasına dair müvafiq sənədlər təqdim olunub. Amma bütün bunlara baxmayaraq, həmin vətəndaşla profilaktik söhbətlər də aparılıb və qanunamüvafiq tədbirlər görülüb.
