Bakının Yasamal rayonu, Murtuza Muxtarov küçəsi, 145 ünvanında söküntü işləri zamanı MTK ilə sakin arasında mübahisə yaranıb. Bu haqda bu gün, 1 iyul tarixində Bakuplus.az Real TV-yə istinadən məlumat verir.
Bildirilir ki, öz mənzilini tərk etməkdən imtina etdiyi güman edilən qadın gecə saatlarında naməlum şəxslər tərəfindən evindən zorla çıxarılıb. Verilən məlumata görə, bir neçə nəfər öncə qadının yaşadığı evə yaxınlaşaraq oradakı çəpəri sökməyə çalışıb. Sonra ekskavator işə salınaraq həm çəpər dağıdılıb, həm də oradakı ağac qırılıb.
Şikayətçi Afət Quliyevanın sözlərinə görə, "İbrahim Q" MTK tərəfindən aparılan söküntü işləri zamanı ona heç bir məlumat verilməyib və bununla bağlı məhkəmə qərar çıxarmayıb:
"Evdə tək idim, heç bir xəbərdarlıq olunmadan axşam saatlarında mənzilin elektrik enerjisini kəsdilər. Qonşularım enerjini bərpa etdikdən qısa müddət sonra 35 nəfərdən ibarət işçi qrupu traktorla vurub evi dağıtdılar. Məni isə sürüyərək, döyə-döyə apardılar. Bütün zinət əşyalarım, pullarım dağıntılar altında qalıb".
Qadın onu da qeyd edib ki, altı il ərzində həmin evin qazı, işığı və suyu kəsilib.
Məsələ ilə bağlı MTK-nın vəkili Yavər Yavərzadə bildirib ki, sakinlə ortaq məxrəcə gəlmək mümkün olmayıb: "Həmin sakin 13,5 kvadratmetr sahədən ibarət mənzilin əvəzinə şirkətdən fantastik rəqəmlər tələb etdiyinə görə onunla indiyədək razılıq əldə olunmayıb. Şirkət yeni tikiləcək binada 50 kvadratmetr ölçüdə mənzil təklif edir və o zamanadək kirayə və təmir pulu tərəfimizdən təqdim olunur. Bununla razılaşmayacağı təqdirdə sahibi olduğu sahənin əvəzinə, bazar dəyərindən qat-qat artıq kompensasiya da təklif olunub. Bütün bunlara baxmayaraq, həmin sakinlə razılıq əldə edə bilmirik. Üç ilə yaxındır ki, digər sakinlər kirayə yaşayırlar və bir nəfərin köçməməsi səbəbindən binanın inşasına başlaya bilmirik".
Daha öncə məlum olub ki, həmin ərazidə sözügedən MTK-nın əməkdaşları ağaclara və kollara ziyan vurublar.
