Bakıda qabyuyan kimi işləyən “ekstrasens” deputat olmaq istəyən qadına qarşı dələduzluq edib. Bu haqda bu gün, 26 oktyabr tarixində Bakuplus.az Qaynarinfo-ya istinadən məlumat verir.
Qadın "Katya" ləqəbli Yekaterina Aleksandrovna adlı qadına müraciət edib. O, qadını ekstrasenslik fəaliyyəti ilə məşğul olmasına inandıraraq şəxsi və ailə həyatında yaranmış çətinlikləri müxtəlif ayinlər keçirərək "şər qüvvələr"dən təmizləyəcəyini bildirib. Nəticədə qadın falçıya müxtəlif vaxtlarda ümumilikdə 8231 manat pul verib.
Yekaterina Aleksandrovna izahatında bildirib ki, qadın ona deputat olmaq istədiyini və bunun arzusunda olduğunu bildirib. “Mən də dedim ki, bu, alınan iş deyil”, – deyə “ekstrasens” iddia edir. O, “özünün təmizlənməsi” üçün qadından yalnız 750 dollar, 2000 manat və 888 manat dəyərində şam pulu götürdüyünü bildirib.
2020-ci ilin fevral ayının 9-da keçirilən seçkilərdə namizəd olsa da, deputat seçilə bilməyən qadın "ekstrasens" barəsində şikayətçi olub.
Daha öncə, AZAL-ın sabiq prezidenti Cahangir Əsgərovun qardaşı oğlu Cəlal Əsgərovun şikayəti əsasında 4 avqust 2023-cü il tarixində “ekstrasens” barəsində axtarış elan edilib, sentyabrın 30-da o, saxlanılaraq həbs olunub. Qadın əməli törətməkdə təqsirli bilinib, 2 il 6 ay müddətinə azadlıqdan məhrum edilib.
