Ötən gün Azərbaycan Memarlıq və İnşaat Universitetinin (AzMİU) rektoru professor Gülçöhrə Məmmədova 44 günlük Vətən müharibəsinin iştirakçısı olan qazi tələbələrlə görüşüb. Bu haqda AZƏRTAC xəbər verib.
Görüşdə tədris işləri üzrə prorektor Akif Qasımov, Tələbə Həmkarlar İttifaqı Komitəsinin sədri Bayram Aslanov da iştirak ediblər.
Rektor qazi tələbələri təbrik edib, qələbə hissini xalqımıza yaşadan igidlərimizlə görüşdən çox məmnun olduğunu dilə gətirib və onlara minnətdarlığını bildirib. Gülçöhrə Məmmədova şəhidlərimizə Allahdan rəhmət diləyib, qazilərimizə can sağlığı arzulayıb.
Görüşdə qazi tələbələr Orxan Məmmədzadə (Nəqliyyat fakültəsi), Samid İbadzadə (İnşaat texnologiya fakültəsi) və Fariz Əzizov (İnşaat fakültəsi) keçdikləri döyüş yolundan danışıblar.
Rektor qazi tələbələrin vəziyyəti ilə maraqlanıb, problemlərini dinləyib, onlara hər cür dəstək göstəriləcəyini diqqətə çatdırıb. Kəsiri olan qazi tələbələr üçün alt dərslərin pulsuz olacağını qeyd edib.
