Paytaxtın bir neçə küçələrinin kəsişmələrində sarı kəsişmə torları silinib. Bu haqda bu gün, 28 fevral tarixində Bakuplus.az ARB Xəbər-ə istinadən xəbər verir.
Silinmiş sarı kəsişmə toru sürücülərin narazılığına səbəb olur. Belə ki, nişanlanma xəttini görmədiklərinə görə onlar kəsişmədə avtomobilləri düzgün saxlamırlar, bu da bəzi hallarda digər sürücülərə maneə yaradır, həm də cərimələnməyə səbəb olur.
“Xətləri görmədiyimizə görə bilmirik orada saxlamaq olar, ya yox. Nişanlanmanın üzərində də saxlayanda bizə 80 manat cərimə gəlir”, – deyə vətəndaşlar şikayət edirlər.
Bakı Şəhər Dövlət Yol Polisinin (BŞDYP) bölmə rəisi Toğrul Nəsirli bildirib ki, bəzi sürücülər yolayrıcından sonra sıxlıq olduğunu bilərək, yenə də hərəkətlərinə davam edirlər. Bu səbəbdən onlar yolun kəsişməsində dayanaraq, digər tərəflərdən gələn nəqliyyat vasitələrinin hərəkətinə maneə yaradırlar.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucov isə qeyd edib ki, yollarda silinən sözügedən xətlər mərhələli şəkildə yenilənəcək.
