Paytaxtda tətbiq edilən pullu parkinq sistemi parklanma qaydalarında nizam-intizam yaratmalı idi. Lakin sürücülər sistemdən narazılıq bildirirlər. Bu haqda bu gün, 13 oktyabr tarixində Bakuplus.az APA TV-yə istinadən məlumat verir.
Sürücülərin narazılığı həm qiymətlərlə, həm də əvvəlcədən pulsuz olan parklanma yerlərinin indi ödənişli olması ilə əlaqədardır.
Azərbaycan Yerüstü Nəqliyyat Agentliyinin mətbuat katibi Tural Orucov bildirib ki, parklama yerlərinin yeni qaydalar əsasında idarə olunması bu sahədə qayda-qanunun bərpasına və qanunsuz pul yığılmasının qarşısını almaqla maliyyə şəffaflığının təmin edilməsinə xidmət edir.
Nəqliyyat eksperti Elməddin Muradlı şəhərin mərkəzində və ya digər zonalarda bütün parklanma yerlərinin ödənişli olmasının doğru olmadığını hesab edir. O, həmçinin qeyd edib ki, gələcəkdə şəhərin mərkəzi küçələrində parklanma ödənişlərinin artması da gözlənilir.
Yeni parkinq sistemi avqust ayında tətbiq olunub. Şəhərin mərkəzində parklanmanın 1 saatı 1 manat, digər zonalarda müvafiq olaraq 70, 40, 30 qəpik məbləğində müəyyən edilib. Ödənişlər mobil tətbiq üzərindən nağdsız qaydada həyata keçirilir.
