Təmir-tikinti şirkətinə müraciət edən vətəndaşlar təmir üçün xeyli müddət böyük məbləğdə pul ödəsələr də, öz evlərinə köçə bilmirlər. Buna səbəb isə təmir-tikinti şirkətinin vədinə əməl etməməsi və işlərini yarımçıq saxlamasıdır. Bu haqda bu gün, 4 noyabr tarixində Bakuplus.az ATV Xəbər-ə istinadən məlumat verir.
“Müqavilə bizdə 2023-ci ilin iyunun 7-si bağlanıb və 3 aya bizə təhvil verilməli idi. O deməkdir ki, sentyabrın 7-si mən bu evə girib yaşamalı idim”, – deyə zərərçəkən Fərid Əlisoy iddia edir ki, təmir-tikinti şirkəti olan “Zühür İnşaat” MMC ilə evinin 3 ay müddətində təmir edilməsi üçün müqavilə imzalanıb. Ancaq vaxt tamam olsa da, işlər bitməyib. Ev sahibi bildirir ki, evində istifadə olunan materiallar keyfiyyətsiz, ustalar isə qeyri-peşəkar olub.
“İlkin ödəniş olaraq 26.000 manat pul vermişəm. Ümumi 40.000 manatın içində pəncərələr, daxili qapılar, çöl qapılar, qaz çəkilməsi, kondisionerin çəkilməsi var idi. İstifadə olunan materiallar keyfiyyətsizdir, usta isə mənə deyib ki, mən YouTube-da baxıb buranı düzəldirəm”, – deyə evin sahibi qəzəbləndiyini bildirib.
Mənzil sahibi ona dəyən ziyanı şirkətdən tələb etsə də, aldığı cavab onu qane etmir.
“Dəfələrlə zəng etmişəm, telefonu götürmədilər. Məcbur olaraq şirkətə WhatsApp-da mesaj göndərdim, onlardan pulu geri tələb etdim. Mənə dedilər: “Gedin, nə istəyirsiniz edin, mən pulu qaytarmıram”.
“Zühür İnşaat” MMC-dən şikayət edən digər şəxs isə Əkrəm Qənbərovdur. O iddia edir ki, şirkətə evinin təmir edilməsi üçün 20.000 manat ödəniş etsə də, iş yarımçıq dayandırılıb.
“Cari il mayın 10-da “Zühür İnşaat” MMC-nin nümayəndəsi Anar bəylə müqavilə bağlayıb, 160 kvadratmetrlik mənzilin təmir edilməsi müqaviləsinin şərtlərinə əsasən, ilkin ödəniş olaraq 20.000 manat pul ödəmişəm. 20.000 manatlıq heç bir iş görməyiblər, iş yarımçıq qalıb”, – deyə Qənbərov şikayət edib.
“Zühür İnşaat” MMC-nin direktoru Anar Abbasov isə iddiaları əsassız adlandırıb. O bildirib ki, təmiri hər 2 şəxs özü dayandırıb. İndi də görülən işlərin pulunu tələb edirlər:
“Biz müqavilə bağladıq, təmirə başladıq. Bir ay ərzində fors-majora görə uzanma olub. Amma mən davam etmək istəyəndə adam istəmədiyini deyib. Biri özü imtina edib, o biri də özü işləməyə imkan verməyib. İkisi də qonşudur”.
Hüquqşünaslar isə bildirirlər ki, bu məsələ artıq məhkəmə predmetidir. Əgər zərərçəkənlər iddialarında haqlı olarlarsa, şirkətdən həm maddi həm də mənəvi ziyana görə təzminat tələb edə bilərlər.
