“Əvvəl özəl şirkətlərdən gəlib bu işlə məşğul olurdular, son vaxtlar heç kim gəlib maraqlanmır. Dəfələrlə müraciət etmişəm, amma maraqlanan yoxdur”, – deyə paytaxt sakinləri son zamanlar tez-tez binaların tüstü bacalarının təmizlənməsi ilə bağlı şikayətlənirlər. Bu haqda bu gün, 19 yanvar tarixində Bakuplus.az AzTV-yə istinadən məlumat verir.
Bildirilir ki, məsələnin onlara aid olduğunu nə rəsmi kommunal qurumlar, nə də özəl şirkətlər deyirlər.
Səbail rayon 5 saylı Mənzil-Kommunal İstismar Sahəsinin rəisi Xamis Osmanovun sözlərinə görə, xidmət ödənişli şəkildə özəl şirkətlər tərəfindən həyata keçirilib. Lakin son zamanlar bu şirkətlər tərəfindən heç bir müqavilələr bağlanmayıb.
“Hər bir mənzil üçün ildə bir dəfə də olsa, bu tüstü bacaları təmizlənməlidir. Özəl şirkətlərə bir növ çağırış etmək lazımdır ki, müqavilə bağlasınlar, çünki tüstü bacalarının təmizlənməsi bu gün çox vacib bir məsələdir”, – deyə o əlavə edib.
Tüstü bacaları ilə bağlı təhlükəsizlik qaydalarına gəldikdə isə FHN bildirir ki, bacalar ildə iki dəfə təmizlənməlidir. Tüstü boruları binaların dam örtüyünün xarici səthindən 70 sm yüksəklikdə olmalıdır. Sobaların korpusunda və tüstü borularında çatlar olmamalı, tüstü borularının təmizlənməsi qış mövsümü başlanmazdan əvvəl həyata keçirilməlidir. Tüstü bacası normal işləmədikdə təkcə dəm qazından zəhərlənmə halı deyil, həm də partlayış və yanğın baş verir.
