Yasamal rayonu, Hüseyn Cavid prospekti, 520-ci məhəllə, 19 binasının birinci mərtəbəsinə edilən müdaxilə binadakı digər mənzilləri təhlükəli vəziyyətə salıb. Bu haqda bu gün, 6 mart tarixində Bakuplus.az Space TV-yə istinadən məlumat verir.
Bina sakini Şahin Axundov iddia edir ki, onun mənzilində meydana gələn çatlara səbəb binanın əsas divarlarına edilən kənar müdaxilələrdi.
Tarixi binanın qəzalı vəziyyətə düşməsini təkcə bütün mənzillərin tavan və divarlardakı çatlar deyil, eyni zamanda binanın bütün mərtəbələrində, bloklarındakı çatlardan da aydın müşahidə etmək mümkündür.
Təmir işləri görülən obyektin icarədarı İnar Məmmədov isə binaya edilən müdaxilədən sonra yaranan vəziyyətə aydınlıq gətirərkən təmirdən əvvəl üç qurumun binaya baxış keçirərək müvafiq icəzələr verdiyini qeyd edib.
Aidiyyəti qurumlar gec də olsa, binanın birinci mərtəbəsinə edilən müdaxilədən xəbərdardırlar. Artıq bununla bağlı məhkəməyə də müraciət edilib. Mədəni İrsin Qorunması, İnkişafi və Bərpası üzrə Dövlət Xidməti sözügedən bina ilə bağlı araşdırmaları davam etdirir.
FHN-dən isə bildirildi ki, sözügedən ünvanda yaşayan sakinlərin şikayəti əsasında binada texniki müayinə aparılıb, akt tərtib edilərək Yasamal Rayon İcra Hakimiyyətinə (RİH) göndərilib. Yasamal RİH-dən isə bildirildi ki, binaya nazirlik tərəfindən baxış keçirilməsindən xəbərdardırlar. Lakin sözügedən akt hələ RİH-yə təqdim edilməyib.
[caption id="attachment_93027" align="alignnone" width="640"]
Foto Space Tv-nin rəsmi Youtube kanalı[/caption]
