Köhnə və yeni tikili binaların ərazilərində uşaqlar üçün oyun meydançaları ya yoxdur, ya da zəbt olunub. Paytaxtda xeyli sayda maydançasız yaşayış binası var. Bu haqda bu gün, 9 noyabr tarixində Bakuplus.az Xəzər Xəbər-ə istinadən məlumat verir.
Yeni tikililərin birində yaşayan uşaq və valideynlərin sözlərinə görə, burada oyun meydançası olsa da, sahəsi çox kiçikdir, ətrafı isə parkinq kimi istifadə edildiyi üçün zəbt olunub. Həyətdə bir sahə da uşaqlar üçün ayrılıb, lakin ora ancaq bağçada qeydiyyatda olan uşaqlar daxil ola bilirlər və qapısı qıfılla bağlıdır.
Uşaqlar deyirlər ki, asudə vaxtlarını keçirmək üçün nəzərdə tutulan yerlərə böyüklər də daxil olanda oynamaq üçün əraziləri daha da məhdudlaşır.
Əksər köhnə tikili binaların həyətlərində də vəziyyət eynidir. Uşaqların əyləncəsi üçün nəzərdə tutulan yelləncəklərin ətrafında avtomobillər saxlanılır.
Əmlak eksperti Ramil Qasımzadə deyir ki, məsələ ilə bağlı yeni qaydaların tətbiqinə başlanılıb. Ancaq bu, sadəcə son iki-üç ildə təməli qoyulan binalara şamil edilir.
“Son vaxtlar Şəhərsalma və Arxitektura Komitəsinin tələblərində artıq bu məqamlar yer alıb. Hər bir binanın yanında sakinlərə asudə vaxtlarının keçirilməsi üçün müvafiq şəraitlər yaradılmalıdır. Binanın tikinti sahəsi minimum yarım hektar olmalıdır və tikilidən əlavə hissənin 75 faizi sakinlərin asudə vaxtının keçiriliməsinə – bağ salınmasına, müasir idman və uşaq meydançalarının qurulması üçün istifadə olunmalıdır”, – deyə ekspert izah edib.
Sakinlərin dediyinə görə, məsələ ilə əlaqədar müvafiq icra strukturlarına müraciət edilib. Cavabında isə deyilib ki, uşaq meydançaları ilə bağlı genişləndirmə və abadlaşdırma işləri növbəli şəkildə həyata keçiriləcək.
