Xarici ölkələrə aşağı qiymətə aviabilet və turistik paketlər təşkil edəcəyi adı ilə vətəndaşları aldatmaqda ittiham olunan Mələk Zeynalovanın cinayət işi üzrə ibtidai istintaq başa çatıb. Bu haqda bu gün, 23 yanvar tarixində Bakuplus.az APA-ya istinadən məlumat verir.
Cinayət işi Bakı Ağır Cinayətlər Məhkəməsinə göndərilib. İşə hakim Aytən Əliyeva tərəfindən baxılacaq.
İstintaq zamanı məlum olub ki, Zeynalova WhatsApp-da qrup yaradaraq insanlara xarici ölkələrə aviabilet və aviaturlar təşkil edib. Vətəndaşlar onlayn ödəniş sistemi vasitəsilə ona pul göndəriblər. Zeynalova həmin vəsaitləri nağdlaşdıraraq şəxsi tələbatlarına xərcləyib. Bununla da Mələk Zeynalova zərərçəkən şəxslərə ümumilikdə 300 min manat məbləğində maddi ziyan vurub.
Faktla bağlı “Külli miqdarda ziyan vurmaqla dələduzluq etmə” maddəsi ilə cinayət işi açılıb, Zeynalova həbs olunub. Mələk Zeynalovanın əməllərindən zərər çəkən şəxslər bu barədə Daxili İşlər Nazirliyinə müraciət edə bilərlər.
