Bakıda 63 yaşlı Mirvari Kərimova bir ildən çoxdur ki, küçədə qalır. O, 11 il qazanxanada yaşayıb, lakin daha sonra oradan çıxarılıb. Bu haqda bu gün, 24 oktyabr tarixində Bakuplus.az Xəzər Xəbər-ə istinadən məlumat verir.
Xadimə kimi işləyən qadın boş vaxtlarında köhnə çörək yığaraq heyvan sahiblərinə satır. Onun sözlərinə görə, uzun müddət qazanxanada məskunlaşsa da, oradan çıxarılıb və həmin məntəqənin qarşısında, küçədə məskən salıb. Qadın deyir ki, onun iki oğlu xəstədir və Dərbənddə yaşayır. Onlara yük olmaq istəmədiyinə görə qadın dörd pişiklə çadırda qalır.
“Azəristiliktəchizat” ASC-nin mətbuat katibi Elvin Basqallı bildirib ki, Kərimova qazanxanada qeyri-qanuni şəkildə məskunlaşıb. Bu, həm iş prosesinə mənfi təsir edirdi, həm də onun özünün həyatı üçün təhlükəli idi. Bu səbəbdən məhkəmə qərarı ilə o, qazanxanadan çıxarılıb.
Sosial Xidmətlər Agentliyinin əməkdaşları qadının sosial xidmətlərə olan ehtiyacının qiymətləndirilməsi üçün əraziyə gediblər, lakin o, yerində olmayıb. Daha sonra onunla əlaqə saxlanılıb, lakin o, sosial xidmət müəssisəsinə yerləşdirilməsi təklifindən imtina edib.
Həmçinin məlum olub ki, qadın əlilliyə görə aylıq 327,2 manat pensiya ilə təmin olunur. Bununla yanaşı, o, “DOST İş” Mərkəzi tərəfindən işlə də təmin edilib və aylıq 345 manat əməkhaqqı alır.
