Gigiyena və Epidemiologiya Mərkəzinin direktor müavini Afaq Əliyeva Bakıda yayılmış hepatit A (sarılıq) və qızılca virus xəstəliklərinə qarşı aparılan işlərlə bağlı məlumat verib. Bu haqda bu gün, 24 yanvar tarixində Bakuplus.az Xəzər Xəbər-ə istinadən məlumat verir.
Əliyevanın sözlərinə görə, sarılığa yoluxma hallarının Suraxanı rayonunun Əmircan və Bülbülə qəsəbələri üzrə müxtəlif orta məktəb və məktəbəqədər təhsil müəssisələrində baş verdiyi müəyyən edilib.
O qeyd edib ki, su çənlərində uzun müddət qalan su sonradan virusa yoluxma hallarına səbəb ola bilər. Buna görə də vaxtlı-vaxtında su kanalizasiya xətlərinin təftişi mövcud su ambarlarının, ehtiyat su çənlərinin qeydiyyata alınması, hər il yuyulub zərərsizləşdirilməsi vacib şərtlərdəndir. O, monitorinqlərin ilkin nəticələrini də açıqlayaraq bildirib ki, hazırda epidemioloji vəziyyət nəzarət altındadır. Yoluxma hallarının sayında azalma müşahidə olunur.
“Yoluxma əllərin yuyulmaması, çirklənmiş sudan istifadə edilməsi, gigiyena qaydalarına əməl edilməməsi nəticəsində baş verir. Bununla əlaqədar hal-hazırda ərazidə əks-epidemik tədbirlər aparılır, monitorinqlər keçirilir. Həyətlərdə olan su çənləri, su anbarları yuyulur, təmizlənir, dezinfeksiya tədbirləri aparılır. Məktəblilər arasında da bu xəstəliklər qeydə alınır. Məktəblərdə olan çənlər də yuyulur, təmizlənir, zərərsizləşdirilir. Həm mərkəzləşdirilmiş su xətlərindən, eyni zamanda çənlərdən su götürülür. Mərkəzi su xətlərindən götürülən “Azərsu”nun suyu bütün dövlət standartlarına cavab verir və tam təmiz sudur”.
Direktor müavini son vaxtlarda baş verən qızılcaya kütləvi yoluxma hallarından da danışıb. O bildirib ki, görülən tədbirlərdən sonra xəstəliyin səviyyəsində azalma müşahidə olunur.
“Həm vaksin vasitəsilə immunitet yaranır, eyni zamanda bu xəstəliyi keçirmiş insanların təbii immuniteti yaranmış olur. Əlbəttə ki, hələ də peyvənddən kənarda qalanlar var, peyvənddən imtina edənlər var. Peyvənd olunmaq istəyənlər tibb müəssisələrinə müraciət etməlidir, poliklinikalarda həm böyüklər üçün, həm uşaqlar üçün vaksin kifayət qədər var”, – Əliyeva deyib.
Afaq Əliyeva əlavə edib ki, qızılcaya yoluxma hallarında azalma bu aydan qeydə alınıb.
