Paytaxtın Yasamal rayonunda yerləşən 175 saylı tam orta məktəbdə müəllimlə şagird arasında insident yaşanıb. Bu haqda bu gün, 10 mart tarixində Bakuplus.az məlumat verir.
Ötən gün, martın 9-da rus bölməsində təhsil alan 7 yaşlı İsmayıl İsmayılov Azərbaycan dili müəllimi Zərqələm Abbasova tərəfindən döyülüb. Bakuplus.az redaksiyası ilə əlaqə saxlayan valideynlərin sözlərinə görə, sinifdə uşaqlar sistematik şəkildə təhqir olunur, hədələnir, döyülürlər və bu dəfə müəllim övladlarının başına kitabla zərbələr endirib, başı partaya vurulub.
Uşaq təcili tibbi yardımın köməkliyi ilə Kliniki Tibbi Mərkəzə çatdırılıb, ilkin müayinə keçirilib. Əlavə olaraq müayinədən sonra neyrocərrah tərəfindən tam müayinədən keçmək tövsiyə olunub.
Hadisə ilə bağlı valideynlər Yasamal RPİ-nin 27 saylı bölməsinə müraciət ediblər və araşdırmalara başlanılıb. Faktla bağlı məhkəmə-tibbi ekspertiza təyin olunub.
Onun sinif yoldaşları da faktı təsdiqləyiblər. Lakin hədə-qorxu ilə onlardan heç biri evdə bundan şikayətçi olmayıb. Vəziyyət valideynlərə məlum olandan sonra digər uşaqların da müəllimdən qorxduqları üzə çıxıb. Məktəblilərin sözlərinə görə, Zərqələm Abbasova uşaqları sinifdə saxlayıb sanitar qovşağına getməyə icəzə vermir, sinifdə naməlum səbəblərdən soyuq olmasına baxmayaraq, uşaqlar üşüdüklərindən şikayət etsələr də, uşaqlara üst paltar geyinmək qadağan edilib.
Hazırda şagirdlərin valideynləri müəllimin dərsdən uzaqlaşdırılmasını və işin Daxili İşlər Nazirliyi tərəfindən araşdırılmasını tələb etməyi planlaşdırırlar.
