Paytaxtdakı təlim avtomobilləri yollarda təhlükə yaradırmı? Bu haqda bu gün, 28 oktyabr tarixində Bakuplus.az ARB-yə istinadən xəbər verir.
Belə ki, Bakının sıx olan mərkəzi küçələrində tez-tez üzərində “Təlim” işarəsi olan avtomobillərə rast gəlmək olur. Bu da yollarda təhlükəli vəziyyət yaradır. Təlimçilər də yaratdıqları təhlükədən agahdırlar, amma deyirlər ki, dərslərin keçirilməsi üçün paytaxt ərazisində uyğun yer yoxdur.
“Kim desə ki, Bakıda boş ərazi var, bizə desinlər. Biz ora gedərik. Məcburuq ki, şəhərə çıxaraq, şəhərdə öyrədək”, – deyə təlimçilər bildirirlər.
Buna baxmayaraq, paytaxtda bu kimi yerlər mövcuddur, ancaq həmin ərazilərə daxil olmaq üçün ödəniş etmək lazımdır. 1 nəfər üçün 1 saatın qiyməti 20 AZN təşkil edir.
Sürücülük təlimlərini mərkəzi küçələrdə keçirmək qanunidir. Həmin şirkətlər dövlət qeydiyyatından keçdikdən sonra təlim keçmələrinə icazə verilir. Hər hansı bir hadisə baş verərsə, əsas məsuliyyəti təlimçi daşıyır.
