Regionlara gedən sərnişinlər qiymətlərdən narazıdırlar. Bu haqda bu gün, 17 fevral tarixində Bakuplus.az ARB-yə istinadən xəbər verir.
Bildirilir ki, bir sıra regionlara marşrut olmadığından sərnişinlər daha uzaq yerləşən şəhərlərə bilet almalı olurlar ki, yolüstü onlara lazım olan yerdə düşsünlər. Bu, onların daha artıq məbləğ ödəməsinə səbəb olur.
Misal üçün sərnişinlər Yevlaxa getmək istəyirlər. Ancaq həmin rayona birbaşa reys olmadığından onlar Tərtərə və ya Bərdəyə bilet almalı olurlar. Bu da getmədikləri yer üçün pul ödəmək deməkdir.
Araşdırma zamanı məlum olub ki, Bakı-Bərdə avtobusunda Yevlaxa getmək istəyənlər üçün məhdud sayda yerlər ayrılır. Bu yerlər dolduqdan sonra isə sərnişinlər Bərdəyə qədər olan tarifi ödəməli olurlar.
“Hər avtobusda 5 limit yeri ayrılır. Əslində kifayət edən bir rəqəmdir, çünki çox vaxt heç 5 müraciət olmur”, – deyə avtovağzalın kassiri bildirib.
Azərbaycan Yerüstü Nəqliyyat Agentliyinin rəsmisi də yerlərin tələbata uyğun hesablandığını qeyd edib.
