Artıq bir neçə gündür ki, ictimai nəqliyyatda gediş-gəliş üçün istifadə edilən “BakıKart” balansının onlayn artırılmasında problemlər müşahidə olunur. Bu haqda bu gün, 27 dekabr tarixində Bakuplus.az 1News-a istinadən məlumat verir.
Bəzi sosial şəbəkə istifadəçiləri qeyd edirlər ki, karta daxil edilən məbləğ ona bir saat ərzində deyil, 1-2 gündən sonra yüklənir.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucovun verdiyi məlumata görə, “BakıKart”da aparılan texniki yeniləmə işləri ilə əlaqədar bəzi istifadəçilərin kartlarına yüklənmiş məbləğ göstərilməyib və ya uzun müddət sonra balansına daxil olub.
“Bununla bağlı problemlər həll olunub. Texniki təkmilləşdirmə işləri yekunlaşıb və vətəndaşlar kartlarına yüklənən vəsaitləri təhlükəsiz idarə edə bilirlər. Belə problemlər yaranarsa, AYNA-nın 141 telefon nömrəsi ilə əlaqə saxlamaq lazımdır”, – deyə Orucov bildirib.
