Bakı metrosunda təhlükəsizlik üçün platformalarda sədlərin qurulması məsələsi diqqətdə saxlanılır, amma bu elə də asan deyil.
Bir gün öncə paytaxt metrosunun iki stansiyasında sərnişinlər qatar yoluna yıxılıb, nəticədə biri həlak olub.
“SputnikAz” xəbər verir ki, metropoliten rəsmisi Bəxtiyar Məmmədov hətta bildirib ki, bununla bağlı “28 May” stansiyasında araşdırma da olub.
“Əksər stansiyalar Sovet dövründə tikilib, o zaman platformada sədlərin qoyulması nəzərdə tutulmayıb. Metroda isə hər hansı struktura kənar müdaxiləyə yol verilmir. Bu adətən metro tikilərkən, daha doğrusu layihələndirilərkən nəzərdə tutulmalıdır”, – deyə Məmmədov bildirib.
O, izah edib ki, platformada təhlükəsizlik qapıları quraşdırılacaqsa, qatar hərəkətindən yaranan hava axının yönləndirilməsi məsələsi ortaya çıxır. Bunun həlli isə kifayət qədər mürəkkəb və maliyyə tutumlu məsələlərdir.
Eyni zamanda metropoliten rəsmisi hazırda da mümkün təhlükəsizlik tədbirlərinin görüldüyünü qeyd edib: “Stansiyaların girişində bəzən gördüyünüz sıxlıq platformanın ifrat dərəcədə yüklənməməsi, sərnişinlərin təhlükəsizliyi üçündür. Pik saatlarda əməkdaşlarımız platformada təhlükəsizliyə diqqət yetirirlər”.
