Bakının Yasamal rayonunun 2-ci Alatava massivində söküntü işlərinə başlanılacaq. Bu haqda bu gün, 5 avqust tarixində Bakuplus.az Xəzər Xəbər-ə istinadən məlumat verir.
Yerli sakinlərin verdikləri məlumata görə, müvafiq strukturun əməkdaşları bir neçə gün əvvəl adıçəkilən əraziyə baxış keçiriblər. Vətəndaşlar onu da bildirdilər ki, hazırda onlara nəzərdə tutulan işlərlə bağlı heç bir məlumat verilməyib.
Ərazidə olan yerli sakinlər və mülk sahibləri söküntü işlərindən narahat olduqlarını bildiriblər. Onlar kompensasiyaların ödənilməsi və yeni mənzillərin verilməsi ilə bağlı dəqiq məlumatın olmamasından son dərəcə narazıdırlar.
Bu ərazi şəhərin inkişaf planı çərçivəsində yenidən qurulması nəzərdə tutulan ərazilərdən biridir. Xırdalan dairəsindən “20 Yanvar” metro stansiyası istiqamətində və əks-istiqamətdə yaranan davamlı tıxac bu yola alternativ köməkçi yolların və qovşaqların tikintisi prosesinə başlanılmasını prioritet vəzifə kimi qarşıya qoyub. Yeni çəkilən yolların və yol qovşaqlarının bir hissəsi 2-ci Alatava ərazisindən keçəcək. Bu plana əsasən, ərazidə müasir infrastrukturun və yeni yaşayış binalarının tikintisi nəzərdə tutulur.
Söküntü işlərinin başlanması ilə bağlı Yasamal rayon İcra Hakimiyyətindən bildirilib ki, yaxın zamanda əhaliyə məlumat veriləcək.
