Paytaxtın müxtəlif rayonlarında eyvanı özündən böyük olan mənzillər var. Belə binalardan biri də Xətai rayonu, Rahib Məmmədov küçəsində yerləşir. Məhz həmin ünvanda yerləşən bina sosial şəbəkələrdə müzakirələrə səbəb olub. Bu haqda bu gün, 1 iyun tarixində Bakuplus.az ATV-yə istinadən məlumat verir.
Beşmərətəbəli binanın 1-ci mərtəbəsində eyvanını qabağa çıxaran sakin bununla kifayətlənməyib. Üstəlik qabağa çıxardığı hissənin üstünü də qabağa çıxararaq 2 mərtəbəli ev tikib. Özünə villa tikmək üçün düzgün məkan seçməyən sakin tərəfindən maşın yoluna qapı da açılıb.
Evin sahibi olan xanım suallara cavab vermək əvəzinə jurnalistlərə xəbərdarlıq edib: “Yaxşı etmişəm. Səndən icazə almamalıyam. Biz icazəni almışıq. Elə bil kibrit qutusudur biz gizlənmişik bunlar nəsə axtarıb tapıblar. Hər binanın qabağında artırma var. Niyə məhz bura? Bu çəkiliş getsin, gör mən nə edirəm”.
Məsələ ilə bağlı Xətai rayonu İH-dən bildirdilər ki, bu artırma illər əvvəl tikilib. Artıq bu kimi tiklilərə icazə verilmir.
Ekspertlər deyirlər ki, bina istismara verildikdən sonra orada əlavə hər hansı dəyişikliklərin aparılmasına icazə yoxdur. Hər hansı qurumun icazəsi ilə belə artırmaların edilməsi isə gələcəkdə daha böyük fəlakətlərə yol aça bilər.
Memar Cahid Həsənovun sözlərinə görə, həmin əlavələr həm binaya əlavə yük verir, həm də şəhərin memarlıq ansamblını korlayır.
Memar, həmçinin deyir ki, belə qanunsuz artırmalara daha çox sovet dövründə inşa edilən binalarda rast gəlinir. Bu binaların əksəriyyəti istismar müddətini bitirib. Yəni həmin binalar bir neçə ilə söküləcək və yeni binalarla əvəzlənəcək. Şəhərimizin görkəminə xələl gətirən əməllər aradan qalxacaq.
