Report-dan verilən məlumata əsasən, podratçı şirkətin mütəxəssisləri və memar Elçin Əliyevin iştirakı ilə binaya baxış keçirilib. Həyata keçirilən işlər qənaətbəxş sayılıb, cüzi nöqsanlar aşkar edilsə də, binaya zərər vurulması xəbəri öz təsdiqini tapmayıb.
Elmlər doktoru, professor, memar Elçin Əliyev tərəfindən təmir işlərini aparan şirkətin nümayəndələrinə müvafiq tövsiyələr verilib.
11:23 - Bakının mərkəzində tarixi binanın fasadı korlanır
Neftçilər prospekti, 65 ünvanında yerləşən tarixi binaya müdaxilə olunur. Bu haqda bu gün, 3 fevral tarixində Bakuplus.az Oxu.az-a istinadən xəbər verir.
1906-1907-ci illərdə tikilmiş Bina memarlıq abidəsidir və dövlət tərəfindən qorunur. Ancaq buna baxmayaraq, tikilinin fasadı cilalama aparatı vasitəsilə ağardılır.
Memarlıq üzrə elmlər doktoru professor Elçin Əliyev bunun yolverilməz olduğunu vurğulayıb.
“Təəssüf ki, heç bir aidiyyəti qurum məsələyə diqqət ayırmır. Bu sahədə kimsə işləməlidir axı. Cəmiyyətdə memarlıq abidələri haqqında danışılır, müzakirələr gedir, amma heç nə dəyişmir”, – deyə o bildirib.
Professor qeyd edib ki, son 3-4 ildə Bakıda fasadların bu cür ağardılmasına rast gəlinmirdi.
“Bu gün biz görürük ki, şəhərin mərkəzində köhnə cilalama aparatları ilə fasadı əvvəllər necə təmizləyirdilərsə, o cür də davam edirlər. Əslində son 3-4 ildə Bakıda belə etmirdilər. İndi yenə başlayıblar. Demək ki, yenə nəzarətsizlikdir”, – deyə memar əlavə edib.
