Bakının Nəsimi rayonu, Rixard Zorge küçəsində quraşdırılan yol nişanlarının bir-birinin əksini göstərdiyi iddia olunur. Bu barədə məlumat sosial şəbəkələrdə yayılıb.
30 il sükanın arxasında olan Bakı sakini videogörüntüləri yayaraq bildirir ki, həmin küçədə 4.1.5 “Düzünə və ya sola hərəkət” nişanından sonra quraşdırılmış nişan tam əksini göstərir və düz istiqamətdə hərəkəti qadağan edir.
Məsələ ilə bağlı Oxu.az saytının redakiyası Bakı Şəhər Dövlət Yol Polisi İdarəsinə müraciət edərək iddiaların düzgün olub-olmamasını dəqiqləşdirməyi xahiş edib. İdarənin inspektoru, polis mayoru Fuad Sultanov sorğuya cavab olaraq bildirib ki, məsələ barədə aidiyyəti şöbəyə məlumat verilib.
Bu vəziyyətin komikliyi və absurdluğu ondadır ki, qurulmuş nişan heç bir şəkildə birinci nişana zidd deyil. Qanunda 5.6 kimi qeydə alınmış yol nişanı ağac budaqlarına görə pis görünsə də, birtərəfli yolun sonunu bildirir və qarşıdan gələn nəqliyyat vasitələri barədə sürücülərə xəbərdarlıq edir.
Nəticədə belə bir sual yaranır: Bakının ən böyük bəlası nədir? Yanlış quraşdırılan nişanlar, yoxsa 30 il ərzində avtomobili sürən və qaydaları bilməyən sürücülər? Yol polisi əməkdaşlarının bu cür cavabları isə cəmiyyətdə daha da çaşqınlıq yaradır.
