Bakının “20 Yanvar” dairəsi yaxınlığında xeyli tibb müəssisəsi olsa da, burada mövcud olan səkilər tamamilə əlillik arabası və yaxud qoltuqağacı ilə hərəkət edən şəxslər üçün nəzərdə tutulmayıb. Bu haqda bu gün, 29 noyabr tarixində Bakuplus.az ARB TV-yə istinadən məlumat verir.
Belə ki, ərazidə M.Ə.Mirqasımov adına Respublika Klinik Xəstəxanası, Onkologiya mərkəzi, Ailə və Sağlamlıq Mərkəzi, Respublika Müalicəvi Diaqnostika Mərkəzi, Bakı Ürək Mərkəzi və digər xəstəxanalar gündə minlərlə xəstələri qəbul edir. Həmin şəxslər şəhərin müxtəlif ünvanlarından buraya metro və yaxud avtobus vasitəsilə çatırlar.
Lakin ərazidə mağazalar və kafelər tərəfindən səkilərin əksəriyyəti zəbt olunub. Piyadalar üçün nəzərdə tutulmuş yerlərdə pilləkən tikilir, zəncirlə “fərdi parkinq” ayrılır, kafe üçün ərazi hasarlanır.
Bunula yanaşı, avtobus dayanacağında da arabalar üçün heç bir şərait yaradılmayıb. Bu səbəbdən fiziki məhdudiyyətli insanlar ətrafdakı vətəndaşlardan kömək istəmək məcburiyyətində qalırlar.
Onu da qeyd etmək lazımdır ki, hazırda həmin ərazidə fəaliyyət göstərən marşrut avtobuslarından yalnız “BakuBus”a məxsus olan nəqliyyat vasitələri əlillər üçün xüsusi panduslarla təchiz olunub.
