Bakının Sabunçu rayonu, Ramana qəsəbəsində "Şuşa şəhərciyi"nin sakinləri 214 saylı marşrut avtobusunun fəaliyyətindən şikayətçidirlər. Bu haqda bu gün, 5 iyul tarixində Bakuplus.az Baku TV-yə istinadən məlumat verir.
Vətəndaşların sözlərinə görə, yaşayış massivinə yalnız bir marşrut xətti var ki, bu da pik saatlarda insanların sıxlığına səbəb olur. Digər problem isə dayanacaqlarda müvafiq aparat olmadığı üçün sərnişinlərin “BakıKart” balansını doldura bilməmələridir.
“Axşam saat 5-6-dan sonra avtobusa minmək olmur, nəfəs ala bilmirik, bəzi insanlar sıxlıqdan huşlarını itirirlər, yaşlı adamlar ayaq üstə getməyə məcbur olurdular”, – deyə yerli sakin narazılığını bildirib.
Mövcüd vəziyyətdən Azərbaycan Yerüstü Nəqliyyat Agentliyi (AYNA) də xəbərdardır. Bildirilib ki, 214 nömrəli marşrut üzrə 18 ortatutumlu avtobus var. Onlar da 5-7 dəqiqə intervalla fəaliyyət göstərir.
Tural Orucov, AYNA-nın mətbuat katibi: “Marşrut xətti üzrə günün pik saatlarında yollarda yaranan nəqliyyat sıxlığı bəzi hallarda hərəkət cədvəlinin pozulmasına səbəb olur. Daşıyıcıya marşrut xəttinin nizamlı fəaliyyəti sərnişin tələbatı nəzərə alınaraq, nəqliyyat vasitələrinin sayının artırılması və yenilənməsi barədə tapşırıq verilib. Bildiyimiz kimi, “BakıKart” plastik kartlarını idarə etmək və səfər planlanmasını aparmaq üçün tətbiq istifadədədir. Bu tətbiqlə istifadəçilər səfərlərini asanlıqla planlaya, “BakıKart” plastik kartlarının balansını artıra və gediş haqqını ödəyə bilərlər”.
Qurumdan, həmçinin qeyd edildi ki, tətbiq istifadəçilərə QR-biletləri yaratmağa və ödənişləri həmin QR-biletlə ödəməyə imkan verir. Eyni zamanda bakıkart.az saytından onlayn qaydada gediş haqqı kartının balansını artırmaq mümkündür.
